عليك وقت شين غريب وقته جينا

عليك وقت شين غريب وقته جينا
حيرنا ونحنا برضنا حايرين
واقع مرير عسير فية اوعينا
خراب وقلاب وذم في الحيين
جامل هضاك وهذا صاحب زينا
وقول هذا ما ينفع وهذا زين
احلامنا تلاشن بلمرار ارضينا
ومن اقلوبنا ولله مو رضيين
حسايف شباب العمر راح علينا
نقدر انقولك في خطف رمش العين
واليوم الزعل كبل امفاصل دينا
اكبرنا علي ظلم الزمان الشين
دلالنا ايام الطيش غرر بينا
عاود علينا قهر وترهدين
انقلبت الدنيا عكس ما ضنينا
هوينا حروف الشعر والتقزين
هوينا ألحان الشعر وموازينا
لشح القوافي عندنا عقلين
مرات نطربو حيل الكلام ايجينا
كما سيل وادي منفلت في عين
⊱━━━━⊰✾⊱━━━━⊰