عام 2023

مراحب ياعام (( 23))
اسمع نحكولك بالتفصيل
افهمها قصتنا بشواش
وداوي ماضينا العليل
العمر اخساره راح بلاش
وجيناك اليوم معاجيل
تمرمدنا من عام ( 11 )
وفينا صار المستحيل
انراجو فالخير وماجاش
عشره اسنين شربنا الويل
نكد فينا تما وارعاش
وطول الليل دموع اتسيل
وتمينا في ايدين احناش
وفي واقع ما ليه مثيل
مصارفنا مافيهن كاش
وحالتنا اتبكي بالحيل
اتعبنا وصارلنا طرطاش
وضعنا وماعد فيه سبيل
الشعب الليبي في الانعاش
وشايل حمل معاه ثقيل
وجوها الدولة ناس اوباش
عرب تسرق في صبح وليل
اتدور راحه ماتلقاش
نزوح وتهجير وترحيل
اتداوي جرحك مايبراش
عذاب وتما الفرح قليل
وحتي الراتب و المعاش
ايجيك بعد نقناق طويل
عرب ماتت ماوالي عاش
الجبانه كل يوم اتشيل